SITI KEUMALA

Tgk Diyueb Bruek

“ SITI KEUMALA “

Assalammua’lakom, tangloeng malakat
Jaroe long akat, sigoe ban dua
Dalam grup pantoen, keu bandum sahbat
Keunan lon intat, saleum keu gata

Hajat lon kisah, saboh hikayat
Mawa ti ubat, ulon calitra
Dua ngoen lakoe, Apa mak risyat
Dengoe hai sahbat, seun seun sibanja

Buet nyoe terjadi, rawi ka meupat
Deungoe hai sahbat, bacut lon atoe
Na sidroe urueng, lon khuen riwayat
Mawa ti ubat, nama tungku e

Lakoe pih tari, lagi pih teupat
Apa mak Risyat, kulet ka keundoe
Anuek geuh saboeh, beujroeh ceudah that
Bibi meukilat, keumang ngoen baho

Siti Keumala, nama jih meuhat
Boh mieng meukilat, punggoeng meugogo
Umu padum treb, po riwat
Keunan troek, meuhat po linto baru

Lakoe pih kaya, nama meugah that
Dijih buet meuhat, meubloe bloe u thoe
Peng jih meuribe, baje meukilat
Hate seunang that po dara baro

Adak mak tuan, pih seunang that that
Hana tom silap, cupe geu atoe
Bak thon limoeng lhe, peureule gisa
Aceh mulia, laju bicah prang

Nyan sinyak Adi, beureuhi kaya
Jak maniaga, u tanjoeng pinang
Di dalam laot, riboet meutaga
Keu Tuhan Esa, jiseurah badan

Moto boet matee, wahe saudara
PT, pih teuka , laju le keunang
Jidrop moto boet, kingkueng ngoen atra
Laju ka jiba, dalam tutupan
(Tgk Diyueb bruek ) 23 Mai 2012

Samboeng laju bacut sapoe…..hue hoe hoe yang galak………

Poma Ngon Ayah

Agam Sidroe

Poma Ngon Ayah 
Poma ngon ayah teulhee ngon guree
Ureung nyan ban lhee meubak ta dhot-dhot
Meunyo na salah meuah talakee
Peumiyub ulee tacom aneuk teuoet

Watee geutanyoe masa lam kandong
Poma nyang tanggong mandum derita
Saket lam tuboh sampoe lam tuleung
Oh kaseb buleun meutarong nyawa

Bak saboh jamok poma meulet-let
Bak saboh pijet poma meujaga
Dua thon punoh ASI katajeub
Tan pre meu siblet geulake doa

Guna diayah ingat rakan lon
Gop yan yang tanggong lam rumoh tangga
Geujak hareukat di rumoh geu troen
Abek sagoe dum geujak useuha

Ujeun ngon badee lam uro tutong
Ladom meutarong ngon bakat raya
Demi beu eek na keu breuh siaree
Bah tuboh lapee mana geukira

Ureung peuturi tanyo Alah Baa
Ureung peuraba haleu ngon hareum
Ureung peu ija tanyo meubaca
Nyang peu blet mata cara meuhitong

Guna diguree han eek takira
Ayah ngon poma han eek tabileung
Ingat hai aneuk bek roh durhaka
Beuget tajaga sopan ngon santon


Diposkan oleh tarmizi.akj ⁠

Meuleha adat

meuleha adat

meuleuha adat seupakat tuha kawoem
meuleuha hukoem muphoem ateuh banja
meuleuha qanun bulueng meu atoran
meuleuha reusam sipadan ateuh jeumba

adat mupakat dalam teumpat dusoen peukan
hukoem meususoen sideh turoen nibak tuhan
kanun meucabeung merureuwueng meu ateung blang
reusam meu ikat deungoen teumpat meu aturan

hukoem allah dalam sunnah ngoen fireuman
hukoen raja lam acara undang undang
hukoem syara`k ka meujamak kanun reusam
hukoem adat laen teumpat laen macam

meunyoe adat sit meukoeh reuboeng
meunyoe hukoem sit meukoeh purieh
meunyoe adat hanjeut takoeng
meunyoe hukoem hanjeut takieh

meunyoe kanun sit meu ateung blang
meunan sit reusam meutangga tangga
meunyoe kanun hanjeut talawan
meunyoe ereusam hanjeut talangga

Anuek Glueh

Tgk Diyueb Bruek

“Anuek Glueh “
Nyoe neudeungoe , Hadis ulon peugah
Bak si uroe, u blang Nabi Neumeulangkah
Na sikeujap, sinan teutap pang ulee Nabi
Deuh neukalon, saboeh kawoem biek yahudi

Di yahudi, jipeureugi masoek hutan
Jithuen taroen, Nabi kalon preh disinan
Antara taroen, deungan Nabi hana jueoh
Gluh lam utuen, keunan jiplueng lan taroen roh

Jimeulawan keudeh keunoe, ka han lhueh le
Sira jimoe, jingadu droe ubak Nabi
Ya Habibi, Ya Maulana, Ya Muhammad
Gaseh saying, lon binatang ka meukeumat

Neupeulhueh lon, ya Habibi siat lon woe
Sayang raya, anuek dua banceh baroe
Rijang keunoe, e pang ule lon keumbali
Saying raya, anuek dua mom lon jak bri

Meunyoe ubah, janji ulon bukon bacut
Miseu umat tan ibadat, ngoen seulawuet
Neulake lon ya pang ulee, bak yahudi
Droe neuh lake, kameuteunte, meuhat jibri

Yoehnyan Nabi, teuka insueh dalam hate
Neujak laju, bak yahudi neupeurab le
Hai yahudi beutaturi, lon Muhammad
Gluh lan taroen, peulhueh rijang jiwoe siat

Dum yahudi, seukalian jimeupakat
Gluh tapeulhueh, taci ujoe si Muhammad
Meunyoe beutoi, binatang kluet keunoe jiriwang
Tanyoe bandum , bak uroenyoe ta iseulam

Suot sidroe, dalam kawan bukon meunan
Jilon sidroe, binatang nyoe, bahle meunan
Padum na hek, dalam utuen pijroek binoe
Ohban karoeh, tajak peulhueh padum rugoe

Glueh jipeulhueh, nibak taroen le yahudi
Laju jiwoe, lake izin nibak nabi
Glueh jipeulhueh, rijang rijang laju jiwoe
Troek bak anuek, meusoek meusoek sira jimoe

Wahe e anuek, tangke dua sikarang
Tabeudoeh laju, jak mom susu rijang rijang
Di ma kadang, jadeh mate bak uroenyoe
Ma meujanji, deungan nabi sideh bunoe

Bak ma jajak, dalam utueng mita raseuki
Hana ma ngieng, taroen jithuen le yahudi
Untoeng na Nabi, neutanggoeng lon bak yahudi
Meudeh sikin, nibak takue po ma jisie

Bukon saying, bungoeng macang mirah mirah
Lon ngieng gata, nyan bandua matoeng mirah
Nyoe troek rimueng, dalam hutuen soe peusiblah
Ma ka mate, bak uroenyoe khendak Allah

Soe bri makanan, japang anuek duek dengoen grah
Gluh jimarit, leumbah leumboet ie mata bobah
Su ot anuek, kamoe dua bek ma gundah
Ma meujanji, deungon nabi neujak peuglah

Keu makananb bek neugundah kamoe lan gle
Ie ie caloek, pat meurumpok sigra minum le
Na ie kubang, hai ma badan bek neupike
Kamoe dua Tuhan peulara, sinoe dalam gle

Oh jideungoe , meunan anuek jimeukalam
Moe meuhob hob, dicoem anuek dua sikarang
Ohlhuen izin, nibak anuek dijak rijang
Mata u likoet jisuroet suroet, anuek jipandang

Glueh jiriwang, rijang rijang nibak nabi
Troek bak taroen, jimasoek droe nibak takue
Glueh pih jimoe, ngoen ie mata laju ile
Ubak nabi, jimeungadu laju sare

Ya habibi ya Muhammad, ya janjongan
Janji ulon dengan gata, ubah jih tan
Sabda nabi, bak yahudi neumeukalam
Glueh ka jiwoe, kalon keudroe ubah jih tan

Di yahudi, bandum sare ka jikalon
Binatang gle, jiriwang le masoek taroen
Di yahudi bandum sare, jimeupakat
Nyoe sibeuna, le mujizat bak Muhammad

Dum yahudi, bandum sare jimeu ucap
Biet sibeuna , beutoi gata hai Muhammad
Kamoe bandum, bak uroenyoe meu iseulam
Meunan yahudi, bandum sare jimeukalam

Gluh jipeulhueh, laju rijang le yahudi
Lake izin ubak rasul, muhammad nabi
Glueh meu ucap, kalimat syahdad pujoe rabbi
Dipeubeuna nabi Muhammad, rasul ilahi

Glueh jigrob grob, seunang hate galak jih that
Laju jiwoe bak anuek droe, laju leugat
Anuek tahe, jikalon ma mantoeng sehat
Sira jimoe, jimarit meunoe laju leugat

Wahie po ma, pakon rijang neuwoe keunoe
Deungan nabi neumeujanji, pue ka seuleusoe
Seu ot po ma, bak masanyan laju bagah
Hana janji, deungon Nabi kareuna Allah

Dum yahudi drop lon bunoe, ka iseulam
Ma jipeulhueh, lon woe laju rijang rijang
Oh jideungon hana bak ma, anuek teuceungang
Nyoe sibeuna, Nabi Muhammad Rasul Tuhan

Aneuk beudoeh, jijak com ma rijang rijang
Jak mom susu, hate rindu that sukaan
Ohnoe habeh riwayat glueh, wahe rakan
Kalhueh lon peugah, tacoek bagah keu pedoman

Dumnan leubeh, Muhammadnyoe rasul Tuhan
Dum binatang gle, deungan Nabi jimeukalam
===================ooo================

WAFUET SITI FATHIMAH”

“WAFUET SITI FATHIMAH”

Subhanallah, wabihamdihi
Fatimah siti, anuek maulana
Masa gog wafuet, ya Rasulullah
Kalhueh neupeugah, wafuet Aneukda

Dilikoet gohnyan, siti fathimah
Bak asoe rumoeh, mula pertama
Alhamdulillah, wabihamdihi
Wafuet siti, ulon calitra

Yoh wafuet nabi, meunguncang ras
Wafuet fathimah, meunguncang donya
Tingai ngoe anuek, hasan ngoen husen
Sit hana laen, agam ban dua

Ibrahim teuma, nibak Mariah
Ban lhe ka sudah, wafuet ka lama
Teuma yang inoeng, yang phoen Fatimah
Zainab rukaiyah, silumueng dua

Di ummi kalsom, meuhat yang tuloet
Zainab masa cut, meuninggai donya
Ali meukawen, dengan Fatimah
Masa di makah, gohlom neubungka

Usman meukawen, dengan Rukaiyah
Pih sit di mekkah, tanoeh mulia
Hana trep teuma, wafuet rukaiyah
Nabi peunikah, kali keudua

Neu pulang balee, noen ummi kalsom
Hana padum thon, wafuet lom teuma
Tinggai Fatimah, laen hana le
Anuek boh hate, saidil ambiya

Lhueh wafuet nabi, teuma le dudoe
Nam buluen sampoe, Fatimah zuhra
Dua boh anuek, cut puteh licen
Hasan ngoen husen, ubit goh raya

Anuek di ali, bak inoeng laen
Hana hai polem, ulon calitra
Uroe keu siblah , buluen ramadhan
Nibak supoetnyan, ka leupah asa

Neucoek ngoen tima, neuba deungoen ie
Sit meunan sabe, dile yang kaka
Neuhoe ngoen anuek , laju neupeutoe
Meusigoe sigoe, teuka ban dua

Neupeudoeng anuek, di atueh bate
Neuple bak ule, peubasah muka
Di anuek tuha, geumanoe keudroe
Teuma di adoe, mantoeng buet poma

Di phon di ule, sampoe u gaki
Madum neugli gli, bandum anggota
Dang neu uet tuboh, anuek boh hate
Sajan ile, dengan ie mata

Anuek ka tahee, aduen ngoen adoe
Teungieng poma droe, tijoeh ie mata
Anuek yang tuha, geutayoeng meunoe
Pakon bunda droe, neuroe ie mata

Yangka u likoet, jan kamoe manoe
Hantom lagenyoe, pakon hai bunda
Laju neujawueb, aneuk boh hate
Singoeh hanale, peumanoe gata

Sang sang jan laen, anuek hana le
Meunan dalam see, leumah bak poma
Uloen hai anuek, sang katoe mate
Saying boh hate, bandua gata

Gata mantoeng cut, anuek boh hate
Hana saboeh le, urueng usaha
Saudara dilon, bandum katan le
Ka habeh meucre, ngoen donya fana

Seubab keunan roet, anuek lon pike
Nyan keuhjuet ile, dengan ie mata
Kadang juet saket, mumang lam ule
Hana saboh thee, di atueh tika

Hasan ngoen husen , di atueh bate
Neucoek neupangke, neucoem ngoen neuwa
Anuek boh hate, anuek meutuah
Peulara allah, gata bandua

Neucoek le anuek, peu ek bak teumpat
Uroe ka jiloep, buka puasa
Uroe keu siblah, malam dua blah
Oh wate sudah, buka puasa

Neusoek seuleukom, seumbahyang meugreb
Sunat ngoen wajeb, reungang hantom bla
Ohlhueh saleum, tamoeng lam wirit
Beungoeh ngon supoet, meunan biasa

Suloeh yang akhe, sabe neubeudoeh
Oh teulhueh suboeh, lom baca doa
Neubaca quraan, neukhuen seulawuet
Zikir neuseubut, bermacam rupa

Lage ka neuyue, le rasulullah
Hana meu ubah, tiep tiep kutika
Nibak malamnyan, teungoeh lam wirit
Jiteuka saket, ngoen tiba tiba

Teungoeh meuzikir , neuseuboet allah
Lammurakabah, atueh musalla
Neupeuyum punyum, tuboeh neu saket
Neupeuseb wirit, dalam musalla

Seulawuet pih lhueh, meutamah saket
Fatimah marit, deungan anuekda
Neutawoek anuek, mandua sigoe
Aduen ngoen adoe, laju le teuka

Neukhuen bak anuek, sajan yue cupet
Badan lon saket, e bijeh mata
Ulon hai anuek, malamnyoe wafuet
Gata mantoeng cut, lon paban teuma

Gata ubit bit, poma hanale
Anuek boh hate, ka meunan kada
Gata lon seurah, bak hukom allah
Meuduek ngoen ayah, siat dang raya

Rasia bak lon, bandum ka leumah
Ya Rasulullah, bunoe neuteuka
Neupeugah bak lon, kajuet meukeumah
Janji bak allah, katroek kutika

Ulon neujak tueng, le rasulullah
Hanjuet tau bah, meusiklep mata
Gata e anuek, lon tinggai siat
Meunan amanat, rasul ambiya

Bak le seulawuet, keu rasulullah
Keu ma ngoen ayah, bak le that doa
Gata e anuek, lon seurah bak allah
Dang dang meutuah, taseutoet poma

Ohban neudeungoe, ka peusan meunoe
Seudeh han bagoe, anuek ban dua
Bunoe yoh supoet, pih kalhueh sigoe
Wate bak manoe, meugreb jiteuka

Wahe e bunda, pakri boh hate
Soe kalon tanle, kamoe ban dua
Oh hana bunda, hana meusampe
Dak jitem bahle, sigoe tagisa

Oh tanle bunda, hana soe papah
Adak na ayah, han jitem sama
Karena ayah, leupah tiep uroe
Digobnyan laloe, suroh rabbana

Bak kadang kadang, keu kamoe tuwoe
Keulileng nanggroe, peukoeng agama
Ohban neudeungoe, anuek khuen meunan
Fatimah yohnyan, tijoeh ie mata

Gata e anuek, ban hukom allah
Di Rasulullah, keusyik di gata
Yatim lam kandoeng, ka tanle ayah
Juet geuplueng bagah, kan tale poma

Tuhan peulara, anuek bek gundah
Milek di Allah, tuboeh ngoen nyawa
Wahe boh hate, cut puteh licen
Bek le tameusyen, anuek keu bunda

Tameuduek siat, ngoen bunda laen
Dang dang meukawen, bandua gata
Bek that tagalak, keu donya dhalem
Seubab na laen, nanggroe bahgia

Dang dang chit tawoe, keudeh bak Allah
Di Rasulullah, pih geupreh gata
Bak donya fana, bacut faedah
Hampue that leupah, keujih ta hawa

Nanggroe bahgia, keu hamba allah
Ngoen Rasulullah, tamoeng syuruga
Meunyoe wafuet lon, anuek meutuah
Sajan ngoen ayah, peumanoe bunda

Gata uet tuboeh, deungoen peusuci
Deungan siram ie, bek tapeujula
Lage geuwasiet, le rasulullah
Peugah bak ayah, Ali Murtadha

Seubab bak ayah, pih ka geuwasiet
Masa goeh wafuet, saidil ambiya
Pat geuyue tanom, le rasulullah
Tayoeng bak ayah, e bijeh mata

Pakri yang wasiet, nibak pang ule
Yoh masa dile, bak ayah gata
Saidina Ali, nibak supoetnyan
Hana meusajan, buka puasa

Saidina ali, nibak meuseujid
Oh kalhueh meugreb, ka neupreh insya
Saidina Ali, dalam watenya
Hate tan seunang, laju neugisa

Hate di Ali, meutampoe tampoe
Neubeudoh neuwoe laju neugisa
………………………………………………………….. bersamboeng

“RANUB SIGAPU “ INOENG ZANIYAH

“RANUB SIGAPU “ INOENG ZANIYAH

Syahdan awai phone, saleum lon rirue
Ranub sigapu, hajat lon intat
Neucoek neupuwoe, pasoe lam lingkue
Seuluepoeng pague, teumoen kameng kab

Beuthat phet reuhang, masam ngoen tabue
Kadang soe tupue, ek juet keu ubat
Neucoek jinoe le, Hate bek ragu
Tuloeng Tuhanku, sit ek mustajab

Kalhueh lon kalon, barat ngoen timu
Kabeh uloen eu, rata juet teumpat
Le that dum kawoem, jisandroeng hantu
Bak kawoem ibu, yang leubeh that brat

Ngoen hate suci, bah lon ci bantu
Kadang ilmu, goebnyan goeh dapat
Ijazah guree, peuneugah tungku
Seun seun sigeutu, jinoe lon surat

Tacoek peudoman, hai bintang timu
Seujarah dulu, haba lam kitab
Ulon boh ragam, alam ngoen buhu
Peugoet keu buku, saboeh hikayat

Kirem keu sahbat, barat ngoen timu
Geulantoe lampu, keu urueng sisat
Inoeng Zaniyah, kisah lon paayu
Bak mita brueh bu, sinan haruekat

Peusiwa badan, keu agam badu
Soe soe yang nafsu, peupuleh syahwat
Inoeng peunzina, nama meusyuhu
Meunan hai tungku , dalam riwayat

Beu ingat ingat, hai kawoem ibu
Nanggroe ka maju, timu ngoeng barat
Restoran reumang, hana trang lampu
Dara yang ayu, sinan hareukat

Ning klub dengan bar, menjalar laju
Sideh di timu, jinoe maju that
Deungan hostes, meulantai hayue
Asai tabayue, beurangpat juet mat

Astaufirullah, leupah that dajue
Meuroeh tatiru, lagenyan adat
Meunyoe di Aceh, jadeh juet karu
Meunyoe neutem ue, nyan meunan meuhat

Saying pisang wak, masak nibakmu
Saying pisang nu, asoe ka batat
Ohnoe lon peuseb, ranub sigapu
Meuah hai tungku, salah ngoen silap
,

‘Inoeng Zaniyah “

 ‘Inoeng Zaniyah “

Dengan Bisminlah, Rahman Rahimi
Wabihamdihi, Azza Wajalla
Dengan na Tuloeng, Rabbul Izati
Jinoe mulai , lon karang haba

Ibnu masu’d, yang seuboet rawi
Bak hadis nabi, geucoek calitra
Na sidroe inoeng, bani israil
Rupa that tari, cantek jeulita

Inoeng zaniyah, nama geurasi
Taboeh areuti, inoeng penzina
Inoeng keulutoek, dak zaman kini
Mita raseuki, sinan beulanja

Astaufirullah, leupah that meukri
Deungon lon rawi, seun seun sibanja
Inoeng Zaniyah, kasah taturi
Jinoe lon khuen kri, sifuet anggota

Rupa cut putroe, na bagoe diwi
Budiya dari, taboeh umpama
Kulet peureuseh, puteh berseri
Dicaya gigi, bagoe mutia

Sapai jih bulat, hebat han sakri
Dua blah pipi, na bagoe kaca
Limo si ulah, dua blah bibi
Keu eng sinyakti, ban bruek biola

Di paluet jaroe, bagoe on buni
Di paluet gaki, bagoe on buga
Bahoe jih keumang, jeunjang han sakri
Dua blah bodi, teungang meubanja

Jipeugoet rumoeh, saboeh meunigi
Teumpat duek putrid, inoeng penzina
Bak simpang jalan, pulang peureugi
Roet ula ili, dum manusia

Ban beungoeh uroe, cut putroe tari
Di hias diri, duek bak jendela
Jisugoet ngoen ok, meulhok han sakri
Dicat ngoen bibi, boh ceulak mata

Jiboeh ngoen beudak, lagak berseri
Boeh minyuek wangi,nibak anggota
Soek bajee lipeh, atra jeh meuri
Leumah terjali, kulet anggota

Pucak seulawah, leumah meuriti
Teumpat beurahi, mainan mata
Duek bak jendela, si dara asi
Peutang ngoen pagi, meunan keurija

Soe soe yang jalan, roet nan peureugi
Tangieng cut putrid, duek bak jendela
Ban tangieng rupa, teuka beurahi
Beuthat beukadhi, alem ulama

Beuthat beu tungku, ban woe di haji
Beuthat beusufi, jadi tergoda
Jipeu ek rangsang, le syetan asi
Keunan paseuti, roeh tamoeng sigra

Meunyoe tatamoeng, dalam meunigi
Ubak cut putrid, yang cantek rupa
Siploeh deureuham, hanjuet han tabri
Nyan baro asi, tamoeng lam kamba

Meutan deureuham, pantang peureugi
Teunte han jibri, barang tahawa
Beuthat tareupah, ta ilah ribee kri
Pinto ji kunci, payah tagisa

Siploeh deureuham, dalam sekali
Sepuas hati, boleh keurija
Sinan beulanja, sidara asi
Sehingga jadi, dijih ka kaya

Meunan keuh cara, mita raseuki
Bak buet yang keuji, larang agama
Dumna peulayang, ngoen yang digaji
Tukang peu ek ie, tukang rhah ija

Tukang sampoh broh,tukang mat kunci
Sama sekali, sinan beulanja
Bandum awaknyan, saban sit asi
Beuthat beu kuli, tukang keurija

Beu ingat ingat, hai umat nabi
Bek jep ie kupi, deungoen peng zina
Beu ingat leupah, ayah ngoen ummi
Bek na terjadi, peugoet meurua

.bek na tameuen, angen kumisi
Peugoet produksi, sarang penzina
Jikalau ada, nyata terjadi
Mari baseumi, bersama sama

Astaufirullah, kisah ka meusie
Lon gisa lagi, pokok calitra
Inoeng zaniyah, kisah tarawi
Kalhueh tatukri, adegan cara

Lagak di mayang, bintang meuriti,
Lagak di R.I, berpanca sila
Lagak karangan, bek saban bunyi
Tatuka Sali, nalam ngoen haba
(Tgk.Abu Mutaleb.A.Gani Ali)